創辦人的話

我係阿Paul，10歲已經立志創業，畢業後打咗幾年工儲到創業第一筆錢，喺29歲出嚟創業，第一門生意好好彩賺到少少錢，但輾轉間又輸返晒，仲要輸到賣樓賣車，銀行存款所剩無幾。輾轉之間嘗試過做梳化生意同創立共享充電品牌，雖然跌低咗，但我相信有朝一日會成功，爬起身咬緊牙關再試多次，味道研究所就係咁樣出世。

2021年嘅平安夜，味道研究所喺疫情期間創立，以創新調味料為品牌的DNA。對我來說，做食品可謂風馬牛不相及嘅新嘗試，但我喜愛創意，一心創造自己的品牌，又鍾意食，結果決定了做食品。我做嘅Shake Shake調味粉起初係「土炮式研發」，自己上網搵食譜然後買材料返嚟整，頭幾次整真係難食到飛起，但整多幾次慢慢就似樣，就係咁成功創作咗8款味道Shake Shake粉，之後好好彩獲得邀請上咗連鎖超市嘅貨架，開始有人認識我哋嘅品牌，真係好開心。

創業路上有起有跌，而成長路上亦都必經各種甜酸苦辣，每一種味道都值得我哋細味品嘗。喺味道研究所呢個品牌裡面，我哋會體驗到生活嘅各種元素及點滴，透過美食拉近人與人之間嘅距及關係，一齊體會生活嘅精彩！